Comhairle Carad: Rún na hAth-Scoilbhliana
Bhí comhrá againn cúpla seachtain ó shin, a léitheoir dhil, faoi mhí Mheán an Fhómhair agus an dóigh ar féidir leis a bheith ina thús nua nádúrtha. Ach an mothaíonn múinteoirí mar an gcéanna?
Fuair mé litir ó dhuine de na múinteoirí sin atá buartha faoi philleadh ar scoil agus ar ghnáthchúrsaí oibre i ndiaidh ‘Samhradh na mBrat*’. Chaith mise trí bliana mar mhúinteoir, agus bliain roimhe sin mar chúntóir ranga, mar sin de, tuigim gormacha dheireadh an tsamhraidh, agus tuigim iad go maith.
Bheartaigh mé an cheist seo a fhreagairt an tseachtain seo, chun tú a spreagadh agus tá súil agam go mbeidh sé ina chuidiú do mhúinteoirí agus daltaí araon.
*Oicé, is mise a luaigh Samhradh na mBrat, ná cuir ceist ar do mhúinteoir scoile faoi!
D, 31
Is múinteoir mé agus beidh mé ag pilleadh ar scoil go luath tar éis dom a bheith saor don samhradh. Shílfeá faoin am seo go mbeinn cleachtaithe leis an ghnáthamh oibre ag deireadh an tsamhraidh ach tá imní mhór orm faoi. Aon leideanna agat ar conas gnáthamh maith a thosú agus a choimeád?
Mar atá ráite agam thuas, is dóigh liom go dtarlaíonn sé seo do gach ball foirne a bhíonn saor ar feadh tréimhse fhada agus atá ag pilleadh ar an ghnáthobair anois. Is cuma cén réimse oibre ina bhfuil tú, baintear geit asat nuair atá ort dul ó laethanta saoire go dtí gnáthamh oibre. Dom féin, baineann cuid mhaith de seo le móiminteam. Má tá tú ag obair gach lá cheana, bíonn sé níos fusa éirí ar maidin agus an lá a dhéanamh arís. Má tá tú gnóthach, bíonn sé níos fusa glacadh le tionscadal eile. Má tá tú imithe ón teach cheana don obair, tá sé níos fusa dul chuig an ghiom. Tuigeann tú!
Mar sin de, is fíor gur tús maith leath na hoibre. Beidh an chéad cúpla lá (nó seachtain) ar scoil níos deacra, ach má leanann tú ort leis an mhóiminteam sin, beidh leat. Agus cén chuid is deacra den lá oibre ag deireadh na laethanta saoire? Éirí ar maidin! Tá go leor nod agam a chuideoidh leat codladh níos fearr a fháil, agus a dhéanfaidh níos fusa duit é éirí ar maidin.
Don chodladh ar dtús: bíodh an seomra fuar agus dorcha. Ól neart uisce sula dtéann tú a luí, seachain scáileáin ar feadh tamaill, athraigh na braillíní leapa, bíodh cithfholcadh agat. Ní duine mé a mholann rudaí a cheannach go minic (sílim go bhfuil go leor ag gach duine agus nach fiú níos mó *rudaí* a mholadh le fadhbanna a réiteach – sin an fáth a ndírím ar nósanna!) ACH tá rud amháin agam a chuidíonn go mór leis an chodladh agus leis an imní: blaincéad ualaithe. Ní blaincéad é seo a dhéanfaidh níos teo thú. Cuireann sé brú ar do scamhóga, agus cuirfidh sin moill ar do chuid anála. Cibé rud a oibríonn duit – déan iarracht gnáthamh láidir a thógáil san oíche agus é a choinneáil mar an gcéanna gach lá.
Ar maidin, tabhair níos mó ama duit féin ná mar a shíleann tú a bheidh de dhíth. Beidh tús u bhfad níos fusa ar do lá muna bhfuil deifir nó strus ort. Déan iarracht rud éigin deas séimh a dhéanamh duit féin ar maidin. Beidh cuma dhifriúil air seo do gach duine: cith, caife deas, ióga nó síniú, dialann a choinneáil, leabhar a léamh, siúlóid a dhéanamh taobh amuigh. Ach roghnaigh rud a chuirfidh spion níos fearr ort ach nach gcoinneoidh mall thú. Rud simplí eile is féidir a dhéanamh le go n-éireoidh tú ná aláram a chur ar an taobh eile den tseomra. Beidh ort éirí ón leaba leis an fhuaim uafásach a mhúchadh ach ná gabh ar ais a luí ina dhiaidh sin!
Is leideanna praiticiúla iad sin agus níl cuidiú praiticiúil i gcónaí chomh praiticiúil sin i réiteach faidhbe mar seo. Sílim go mbaineann do cheist le meon, agus ní hamháin le cúrsaí gnáthaimh. Mar sin de, cén dóigh ar féidir meon níos dearfaí a chothú i leith thús na scoilbhliana? Bhuel, tá sé simplí agus níl sé simplí.
Aimsigh na rudaí deasa faoina bheith ar ais ar scoil. Tá tú ag bualadh le do chuid comhoibrithe agus cairde gach lá. Is féidir leat ceachtanna deasa a ullmhú do pháistí. Is féidir leat feisteas deas oibre a chur ort féin. Is féidir leat labhairt faoin ábhar is fearr leat gach lá agus caithfidh daoine éisteacht leat (seo an rud ba mhó a thaitin liomsa agus mé i mo mhúinteoir Mata!) Seans go bhfuil áit dheas cóngarach duit ar féidir leat a bheith ag siúl ann. Seans go bhfuil caifé deas in aice na scoile ar féidir leat báinín fanaile a ordú uaidh. Is féidir leat cuairt a thabhairt ar an chara sin a chónaíonn taobh leis an scoil.
Ar an ábhar sin, aimsigh na rudaí atá deas faoi theacht an fhómhair fosta. Bain sult as áilleacht na nduilleog agus a ndathanna éagsúla. Cuir do chosa in airde ar an tolg le cupán tae deas gan a bheith ag mothú ciontach as fanacht taobh istigh. Tá cead agat, tá sé ag stealladh báistí. Is féidir éadaí teo teolaí a chur ort féin gan a bheith ag bárcadh allais. Agus tá Oíche Shamhna ag druidim linn!
Má dhéanann tú do mhachnamh ar na rudaí maithe faoin áit ina bhfuil tú, ní chronóidh tú an áit ina raibh tú cúpla seachtain ó shin an oiread céanna. Tá rudaí maithe ann faoi gach cuid den bhliain, má chuartaíonn tú iad.
An bhfuil comhairle uait? Seol ceist nó fadhb, mór nó beag, chuig Kathryn san fhoirm anaithnid seo, agus beidh freagra do cheiste agat i bhfoirm colúin!
The post Comhairle Carad: Rún na hAth-Scoilbhliana appeared first on NÓS.
