Rosc catha ar son an neamhspleáchais eisithe ag Griogair agus Alan Cumming
10 mbliana ó reáchtáladh an reifreann cinniúnach ar neamhspleáchas na hAlban, tá amhrán úrnua seolta ag an cheoltóir aitheanta Gàidhlig Griogair Labhruidh, in éineacht leis an aisteoir cáiliúil Alan Cumming, ar mhaithe le spiorad na saoirse a lasadh sa tír athuair.
‘2014’ is teideal don traic ina bhfuil meascán bríomhar den phíobaireacht agus den hip-hop, mar aon le liricí géara faoin vóta mór, go háirithe faoi na bréaga a scaip rialtas Londan faoin neamhspleáchas ag an am agus ó shin.
“Bliadhna nam breug” a thugann Griogair ar 2014 sa chéad líne den amhrán agus leanann sé cinn de véarsaí i nGàidhlig bhinn bhiorach le cois blúirí de Bhéarla cliste ó Alan, a bhfuil clú bainte amach aige as a ról sa seó The Good Wife agus i gcláracha go leor.
Casadh an bheirt ar a chéile le linn na sraithe Miriam and Alan: Lost in Scotland and Beyond, a craoladh ar Channel 4, agus nuair a d’iarr Griogair ar Alan a bheith ag comhoibriú leis ar a shaothar nua, thapaigh an t-aisteoir an deis ar an toirt.
“Tá dúil mhór agam i gceol Ghriogair agus san obair a dhéanann sé leis an Ghàidhlig a choinneáil beoga agus i mbéal an phobail,” arsa Alan.
“Mar dhuine a thacaíonn le neamhspleáchas na hAlban, tá frustrachas mór orm, mar atá ar Ghriogair, maidir leis na gealltanais bhréagacha a tugadh dúinn díreach roimh an reifreann in 2014.”
Deir an bheirt gur rabhadh atá san amhrán faoin mhéid atá Westminster toilteanach a dhéanamh chun an dubh a chur ina gheal ar na hAlbanaigh i dtaca lena dtodhchaí féin agus, ag an am céanna, gur rosc catha é chun athbheochan a dhéanamh ar an phlé faoin neamhspleáchas.
Is amhránaí agus píobaire é Griogair a bhfuil an-aithne air ar an taobh seo de Shruth na Maoile agus is é ‘2014’ an chéad eisiúint óna albam aonair, SOLACE, a bheidh le cluinstin ina iomláine i mí Feabhra 2025.
Is féidir cuidiú le togra an albaim anseo.
Tá an comóradh ar an reifreann, a chaill lucht ‘Bu chòir’ 45% i gcoinne 55%, i ndiaidh suim as an úr a chothú i gceist an neamhspleáchais.
Dar le suirbhé a foilsíodh inné gur mhaith leis an chuid is mó de mhuintir na hAlban reifreann eile a bheith acu taobh istigh de 10 mbliana.
The post Rosc catha ar son an neamhspleáchais eisithe ag Griogair agus Alan Cumming appeared first on NÓS.
