![](https://stage.peig.ie/wp-content/uploads/2023/07/4.png)
Naíonraí
Déantar cur síos anseo ar naíonraí – céard iad, conas a d’aimseofá iad, agus cé hiad na heagraíochtaí is tábhachtaí a bhaineann leo.
Is éard atá i gceist le naíonra ná grúpa páistí idir 3-5 bliana d‘aois a thagann le chéile go rialta (2-3.5 uair a chloig sa lá) i dtimpeallacht thaitneamhach faoi stiúir Stiúrthóra.
Cuirtear béim faoi leith ar fhorbairt fhisiciúil, intleachtúil, chruthaitheach, shóisialta, mhothúchánach agus teanga an pháiste. Déantar é seo trí mheán an spraoi agus na Gaeilge i dtimpeallacht atá sábháilte, spreagúil agus tacúil.
Cá bhfuil an naíonra is cóngaraí dom?
Tá naíonraí bunaithe ar fud fad na tíre. Tá liosta de na naíonraí lasmuigh den Ghaeltacht ar fáil ón eagraíocht Gaeloideachas anseo.
Cé hiad Gaeloideachas?
Is eagraíocht dheonach náisiúnta í Gaeloideachas a thacaíonn le forbairt an oideachas lán-Ghaeilge. Bunaíodh í mar Gaelscoileanna i 1973 le tacú le bunscoileanna agus iarbhunscoileanna lán-Ghaeilge lasmuigh den Ghaeltacht. Ó shin, leathnaíodh ról na heagraíochta agus cuireann sí seirbhísí tacaíochta ar fáil anois do scoileanna Gaeltachta agus naíonraí lasmuigh den Ghaeltacht chomh maith.
Seirbhísí luathbhlianta ó Thuaidh
Is eagraíocht tacaíochta réigiúnach í Altram do thionscadail oideachais luathbhlianta lán-Ghaeilge. Bunaíodh sa bhliain 1990 é ag naíscoileanna i nDoire, i mBéal Feirste, in Ard Mhacha agus san Iúir. Cuireadh Altram ar bun chun tacaíocht a thabhairt do thionscadail oideachais luathbhlianta lán-Ghaeilge, caighdeán an tsoláthair oideachais san earnáil a fheabhsú, agus béim a chur ar thábhacht an tsoláthair sin trí mheán na Gaeilge. Oibríonn Altram go dlúth le naíscoileanna atá ann agus le naíscoileanna atá ag teacht chun cinn.
Seirbhísí luathbhlianta sa Ghaeltacht
Cuireann Comhar Naíonraí na Gaeltachta an t-infreastruchtúr in áit chun seirbhísí luathbhlianta a chur ar fáil as Gaeilge, sa Ghaeltacht, agus cuireann sé seirbhísí riaracháin, tacaíochta agus traenála ar fáil do na seirbhísí, tuismitheoirí, coistí agus pobail Ghaeltachta.
Tuilleadh Eolais
- Oideachas Réamhscoile agus Cúram Leanaí (Faisnéis do Shaoránaigh)
Dáta uasdátaithe: Iúil 2023