Pup Up Gaeltacht #2 agus imeachtaí eile
Ceardlanna Raidió, Raidió na Life // Dé Sathairn, 29 Feabhra, 63-66 Sráid Amiens @ 11:00
An bhfuil suim agat i gcúrsaí raidió? An bhfuil tuiscint éigin agat ar an gcúram ach ar mhaith leat cur le do chuid scileanna? Tá ócáid á heagrú ag an deireadh seachtaine a bheidh oiriúnach duit, más rud é gur thug tú freagra dearfach ar an dá cheist thuas!
Lá iomlán beagnach, 11.00-16.00, atá i gceist le réimse leathan aoi-chainteoirí ar chlár oibre an lae. Díreofar ar dhrámaí raidió agus ar chláracha faisnéise leis an scríbhneoir Réaltán Ní Leannáin agus an léiritheoir Cathal Póirtéir ar maidin.
Sa tráthnóna beifear ag díriú ar an éiteas a bhaineann le raidió pobail agus scileanna praiticiúla.
Níl mórán de chostas air, díreach €7 do na seisiún agus tá lón agus sólaistí san áireamh chomh maith. Chun clárú don gcúrsa, nó chun tuilleadh eolais a fháil, is féidir teagmháil a dhéanamh le lucht an stáisiúin ar 01 6616 333 nó ríomhphost a sheoladh chuig judy.meg@raidionalife.ie
Siamsán Scéalaíochta // An tIonad Tacaíochta Teaghlaigh, Indreabhán, Dé Sathairn 29 Feabhra @ 11:00
Tá siamsán scéalaíochta eagraithe ag Tuismitheoirí na Gaeltachta agus beidh sé ar siúl maidin amárach. Is éard atá i gceist leis seo ná seisiún scéalaíochta do dhaoine óga… is san Ionad Tacaíochta Teaghlaigh in Indreabhán a bheidh sé ar bun agus gan aon chostas air. Ní mór, áfach, áit a chur in áirithe, ach glaoch fóin a chur ar 091 869571.
Seoladh an albaim Maidin Fhómhair // Cultúrlann McAdam Ó Fiaich, Béal Feirste, Dé Sathairn 29 Feabhra @ 13:00
Nach álainn an t-albam Maidin Fhómhair, leis an mbanna ceoil Ériú, a léiríonn go beacht an cumas atá i mbaill an bhanna. Tá siad breá in ann stíleanna éagsúla a sníomh go snasta tríd an gceol traidisiúnta agus rianta tarraingteach, pléisiúrtha a chruthú dá bharr. Tá a lorg féin fágtha acu ar classics ár linne, ó Amhrán an Steampaí go Norwegian Wood na mBeatles! Molaim a gcuid oibre go mór agus molaim duitse cluas a thabhairt don saothar nua seo. Seolfar é sa Chultúrlann i mBéal Feirste amárach, aimsir lóin. Gach rath orthu.
PopUp Gaeltacht // The Singer Tavern, City Rd. Londain Dé Sathairn 29 Feabhra @ 17:00
Luaigh mé leat cúpla seachtain ó shin gur mhaith liom ó am go ham trácht a dhéanamh ar ócáidí atá ar siúl in áiteanna níos faide i gcéin ná Éire. Is ar an mbonn sin a luaim PopUp Gaeltacht LDN atá ar siúl sa Singer Tavern amárach. Beidh lá Gaeilge ar bun in Ollscoil Learphoill an lá céanna agus mar chlabhsúr ar na himeachtaí sin ar fad, baileoidh lucht labhartha na Gaeilge le chéile sa tábhairne áirithe seo. Tá biachlár deas acu deirtear liom, má bhíonn ocras ar éinne tar éis an lae…. Míle fáilte roimis na héinne, cuma cén caighdeán Gaeilge atá agat!
Pup Up Gaeltacht // Páirc an Fhionnuisce, Dé Domhnaigh 1 Márta @ 12:00
Má tá gadhar agat agus fonn ort iad a thabhairt ag súil i gcomhluadar na nGael, taitneoidh an ócáid seo leat. Pup Up Gaeltacht atá air, (an dara ceann atá eagraithe go nuige seo ag Ian Mac Gabhann) agus bíonn sé ar bun an chéad Domhnach den mhí. Baileoidh madraí agus úinéirí le chéile ag céimeanna Chros an Phápa i bPáirc an Fhionnuisce agus rachfar ag súil le chéile. Is í an Ghaeilge teanga na hócáide seo…. deis mhaith chun aithne a chur ar dhaoine nua agus deis dod mhadra aithne a chur ar mhadraí nua chomh maith!
