Deir aire infreastruchtúir Stormont go bhfuil dóchas aige go mbeidh an Ghaeilge le feiceáil amach anseo i Mórstáisiún Láir nua Bhéal Feirste.
Ag labhair dó ag oscailt oifigiúil an lárionaid iompair inniu, dúirt an tAire John O’Dowd gur údar díomá é gur Weavers Cross amháin atá á thabhairt ar an bhforbairt nua agus nach bhfuil an chomharthaíocht ansin dátheangach.
Dúirt O’Dowd, go raibh dóchas aige, áfach, go dtiocfaí ar réiteach maidir le ceist na Gaeilge sa mhórstáisiún nua a chosain €403 milliún.
In ainneoin go raibh Comhairle Cathrach Bhéal Feirste agus lucht feachtais ag éileamh go mbeadh brandáil agus comharthaíocht i nGaeilge le feiceáil sa mhórstáisiún nua, cinneadh cur chuige aonteangach a chur i gcrích.
Dúirt lucht feachtais gurb amhlaidh go raibh pobal na Gaeilge “á bhrú go dtí cúl an bhus” sa chathair.
Dúirt O’Dowd go raibh sé i mbun cainteanna le Translink faoin scéal.
“Tá díomá orm nár éirigh linn teacht ar réiteach faoi sin go fóill,” arsa an t-aire de chuid Shinn Féin.
“Tá sé tábhachtach go mbeadh an Ghaeilge le feiceáil. Tá borradh faoi phobal na Gaeilge i mBéal Feirste agus tá sé tábhachtach go bhfeicfí an teanga. Táim ag obair le Translink air sin agus táim muiníneach go dtiocfaimid ar réiteach. Mar aire, caithfidh mé leas a bhaint as na cumhachtaí atá agam ar bhealach stuama. Bíonn sé i bhfad níos éifeachtaí comhoibriú le daoine.
“Tá príomhfheidhmeannach agus bord a bhfuil an cúram orthu Translink a rith agus tá mé ag obair leo sin i dtaca leis an ábhar seo.”
Tá an stáisiún, tairseach nua Bhéal Feirste, á oscailt céim ar chéim agus níos déanaí a chuirfear tús leis na seirbhísí traenach ann.
Dúirt O’Dowd gur údar mórtais do Bhéal Feirste a bhí in oscailt an stáisiúin nua. Dúirt sé, áfach, go gcaithfí cur le seirbhísí iompair ar fud an Tuaiscirt, go háirithe i nDoire.
Dúirt sé go raibh staidéar á dhéanamh ar sheirbhís traenach a cheanglódh Doire le hAerfort Idirnáisiúnta Bhéal Feiste agus le Baile Átha Cliath agus Corcaigh.
Tuairiscíodh an tseachtain seo caite gur córas Béarla amháin a bheadh sa lárionad taistil nua i mBéal Feirste.
Ghlac Comhairle Cathrach Bhéal Feirste i mí Aibreáin le rún ag éileamh comharthaíocht Ghaeilge ag an mhol iompair nua ‘Weavers Cross’ nó ‘Cros na bhFíodóirí’ i lár na cathrach.
Éilíodh sa rún a ritheadh sa Chomhairle chomh maith go mbeadh comharthaíocht dhátheangach le feiceáil sa stáisiún agus sa cheantar timpeall air.
Mhol an Chomhairle do Translink, atá i mbun na forbartha, go gcuirfí comharthaíocht dhátheangach laistigh agus lasmuigh den stáisiún bus agus traenach nua atá tógtha ar shuíomh stáisiún Europa.
Bhunaigh an Dream Dearg feachtas ag iarraidh go mbeadh comharthaíocht dhátheangach le feiceáil ag suíomh an lárionaid taistil nua.
Dúirt Padaí Ó Tiarnaigh, urlabhraí ó An Dream Dearg, go raibh díomá mhór orthu faoi chinneadh Translink córas aonteangach Béarla a chur i gcrích sa lárionad nua “atá lonnaithe ar imeall na Ceathrún Gaeltachta i mBéal Feirste, ag Cros na bhFíodóirí”.
